玻璃碎係頭號海洋垃圾

【明報專訊】環保促進會每年都會邀請市民組成義工團隊執海岸垃圾，上年就有多達3000多名義工，去全港43個地點做清潔，合共清理超過5600公斤垃圾，並喺噚日公布本港「十大海洋垃圾」名單。促進會話，玻璃碎片今年取代塑膠袋晉升第一位，佔總共5萬多件垃圾中嘅23.2%，達1.6萬件；其次係發泡膠箱，佔10.4%，膠袋佔9.7%排第三。


環保促進會行政總幹事何惠萍話，十大海洋垃圾全部都係嚟自岸邊及康樂活動，包括發泡膠箱、飲品膠樽、食物包裝紙同盛器等。煙頭更係連續21年列入十大海灘垃圾，去年檢獲逾6000個煙頭，較上一年增加一倍，可見煙民未有理會海灘禁止吸煙。至於玻璃碎片成為頭號垃圾，反映政府對玻璃製造、處理及回收嘅政策未盡完善。