工展會跳出香港去廈門

【明報專訊】早前圓滿結束嘅工展會，總銷售額達7億元，搞手中華廠商聯合會當然非常滿意，原來佢哋已經摩拳擦掌，準備喺4月到廈門舉辦工展會。


家內地人咁鍾意嚟香港買奶粉，廠商會會否喺工展會邀請奶粉商參加呢？副會長吳永嘉話呢個建議都唔錯，但時間有限，亦要睇奶粉商願唔願意參加，否則內地工展會嘅參展公司，應同香港工展差唔多。


香港工展會有工展小姐，喺廈門嘅工展會都搞工展小姐，仲要開放畀任何人而非只限參展商嘅員工參加。內地對選美有限制，廠商會已經請咗內地嘅顧問公司幫手，入圍嘅工展小姐，最後會透過抽籤，配對落去唔同嘅參展商，到時佢哋一方面可以幫手推廣香港公司嘅產品，評審又可以透過佢哋嘅推銷表現揀選勝出者，一舉兩得！