卿姐同CY傾敵我矛盾

【明報專訊】民主黨雖然話過唔會同特首梁振英（CY）食飯聯誼，但噚日佢哋5位立法會議員就去咗禮賓府同CY食早餐，佢哋話食早餐係傾施政報告，唔算聯誼。劉夢熊早前爆料話CY講過同泛民係「敵我矛盾」，民主黨主席劉慧卿餐後就話同CY傾過呢個問題，但卿姐唔肯引述CY點答，叫Emily自己去問，又話CY聽到後只係笑笑口。


黨副主席單仲偕就話，佢臨走前「讚」咗CY一下，話佢上任只係幾個月，已經咁多人上街，首任特首董建華7年先做到嘅事，CY咁快就搞掂。好彩，出名火爆嘅中央政策組首席顧問邵善波，噚日冇去食早餐，只得特首辦主任邱騰華陪CY，唔係嘅話，氣氛恐怕冇咁平和。


民主黨﹕傾施政報告唔算聯誼

單仲偕話，會面中雙方用咗好多時間講政改，包括重申民主黨要求2016、2017同埋2020年選舉一次過立法嘅立場等。不過，單仲偕話「冇新嘢聽到」，民主黨係「無期望，所以無失望」。


噚日涂漌申冇去早餐會，佢話係因為想講嘅已經講咗，關於政改問題，想留番喺立法會發表。據講民主黨仲同CY傾到房屋、貧窮、退休保障、奶粉供應等。被問到CY屋企有咩食，單仲偕就話有水果、粥、腸粉，食品都好清簡。


下周二同財爺食晚飯

民主黨下周二仲會同財政司長曾俊華食晚飯，單仲偕話，本來會係正式會面，但今年因為財政預算案同施政報告一齊諮詢，所以改食晚飯傾偈。