「我會穿花戴紅坐監」

【明報專訊】再下個周日就係大年初一，不過，66歲社運人士古思堯（圖右二）隨時要喺監倉過年，皆因佢舊年6月喺中聯辦燒國旗哀悼「被自殺」嘅內地民運人士李旺陽，今年又揸住塗污嘅國旗、區旗參加示威，下周四就要面對4項侮辱國旗罪判刑。


下周侮辱國旗罪判刑

Emily問佢擔唔擔心，佢就話一早預咗，仲好嚴肅咁講﹕「李旺陽砍頭也不回頭，我坐一年半載有乜所謂。（下周）我會穿花戴紅，高高興興入去坐監！」


古思堯外表睇嚟不修邊幅，但噚日喺東區法院受審嗰陣講嘢斯斯文文。佢連律師都無請，控方話佢乜佢都認晒，佢陳辭時話﹕「檢控官喺法律觀點考慮問題，但我係政治因素考慮問題。」


佢話，中國共產黨係屠夫政府、黑社會政府，五星旗唔代表中華民族，所以佢覺得燒國旗並無錯。不過，呢啲觀點，裁判官覃有方講到明法庭唔會考慮。Emily祝佢好運，希望佢唔使坐咁耐啦。