狙擊支聯年宵檔現身

【明報專訊】維園年宵今日正式開爐，為期一星期嘅大作戰正式展開。支聯會今年競投檔位時遭神秘人狙擊，唔單止未能一如以往投到1號同2號孖舖，唯一投到嘅1號攤位仲要以9萬蚊嘅歷史高價成交。取下2號攤位嘅呢位仁兄，一直相當神秘兼拒受訪，而佢嘅身分噚日終於揭盅——就係「天際數碼」。


「天際數碼」 香港冇註冊

畀支聯會同民主黨夾住嘅2號攤位，噚日終於有工作人員佈置，掛起「天際數碼」嘅橫額。Emily噚日上網查冊，發現香港無一間名叫「天際數碼」嘅公司，但深圳就有間同名嘅「天際數碼科技有限公司」，兩者係咪有關就不得而知喇。


張文寫揮春 支聯民主黨兩邊走

支聯會常委張文光慨嘆，支聯會仲打算今年喺年宵賺番筆，建立永久六四紀念館會址，如今只能賺錢為交檔租。為咗密食當三番，佢由今日起，每晚黃昏後都會喺支聯會幫大家寫揮春，有空餘時間先會抽身去隔籬幫黨友民主黨寫字。佢講笑話，民主黨年年年宵都靠佢同何俊仁寫揮春，呼籲黨友好快啲練字喎。


支聯會主席李卓人就透露，今年支聯會將推出民運歌CD。佢話今年支記一擲萬幾蚊買起歌曲版權，等大家除咗喺維園，都可以喺屋企聽《媽媽我沒有過錯》同《自由花》等民運歌。阿人自己亦要分身喺工黨攤位站台，佢日前仲特登學識扭氣球，把氣球扭成公仔形狀，務求吸引小朋友，大小通吃。


社民連擺大話CY布景板

社民連就喺攤位度整咗個巨型梁振英布景板，同時播放梁振英嘅「金句」，每當佢講大話時，佢個鼻就會不斷伸長，離遠睇真係畀佢嚇親。