油街紅磚古屋改建視藝中心

【明報專訊】Emily成日經過北角油街，見到有幢紅磚古老建築物，一直空置無人用，睇完民政事務局長曾德成噚日網上專欄「局長隨筆」，先知原來上址係前香港皇家遊艇會會所，康文署家改建緊做視覺藝術展覽同活動中心，嚟培育年輕藝術人才，今年內會完成。


前身皇家遊艇會

前香港皇家遊艇會位於北角連接艇街同油街嘅一段電氣道，1908年建成，艇街都係因為咁而命名。後來因為填海，海岸線移前，遊艇會喺1938年搬到銅鑼灣奇力島，原址曾被改做職員宿舍、臨時文物倉庫，又租過畀藝術工作者，到1995年獲評為二級歷史建築。


遊艇會舊址家仲有幾座相連嘅紅磚古老建築物，有一層嘅、兩層嘅，都有金字形黑瓦屋頂，仲有煙囪同水管。


局長話，油街視覺藝術展覽同活動中心，會有兩個分別約190同92平方米嘅展覽廳。兩層高嘅樓上長遊廊可以遠眺海景，旁邊單層建築樓頂特高，方便藝術家盡情發揮，兩個建築群之間又有一個約300平方米嘅花園，展示室外藝術品。