葉太收「抄功課」牌

【明報專訊】呢排唔少港媽為撲奶粉搞到頭都痕，噚日港台《城市論壇》講起奶粉，連男觀眾都好激。維園一向好多「阿伯」、「阿哥」，其中做過旅遊業嘅觀眾林鴻達（Jacky）都好識攝位，喺台下發言時就話，「噚（前）晚微博傳出唔搶奶粉，但搶衛生巾」，仲話嘉賓唔使用，「但係好多女士要用」。台上唯一女講者葉劉淑儀聽到都笑一笑，叫佢唔好歧視人喎！


Jacky似乎對葉太意見多多，佢又話係博客先提出將奶粉列為儲備商品，而唔係葉太，批評佢偷橋，仲送咗個「抄功課 下次小心啲啦」嘅示威牌畀葉太，不過葉太無帶個牌走。


話微博傳搶衛生巾

除咗葉太成焦點，身兼旅發局主席嘅田北俊都畀佢批評。Jacky話內地旅客佔來港總旅客七成，旅發局係自由行幫兇，責無旁貸，要求田少辭職。但係田少一句「我都夠鐘（離任）唔使辭職」，就打發咗佢走喇。