城大畢業生

【明報專訊】Emily呢幾年睇獨立電影愈嚟愈多，見唔少生力軍入行，噚日城市大學同Emily講，佢哋創意媒體學院其中4個畢業生，喺香港同台灣嘅影片比賽中贏咗6個獎，當中參加過「佔領中環」嘅盧鎮業（小野），就憑住拍攝社運攞到第12屆台灣南方影展嘅「當代觀點獎」同「人權關懷獎」。


盧鎮業拍社運揚威

前年畢業嘅小野，除咗做導演，仲試過粉墨登場，擔任港台《女人多自在4》其中一個單元主角。佢得獎嘅獨立電影《那年春夏．之後》，記錄咗香港喺2010至2012年間嘅元旦遊行、菜園村反拆遷運動、佔領中環等。小野話家一邊修讀文化研究碩士，一邊拍紀錄片，希望透過60幾歲嘅洗碗工，探討乜嘢人需要社會保障。


至於分別喺前年同上年畢業嘅李心悅、林樂騫同譚惠貞，就喺香港「鮮浪潮2012——國際短片展」攞獎。李心悅讀書嗰時攞過賽馬會獎學金，作品《忘語花》講述任職殯儀館旁花店嘅男主角，同家人關係唔好，要到個仔死咗，先至反省，識得改善同屋企人關係，《忘語花》攞到鮮浪潮大獎同公開組最佳電影獎。林樂騫同譚惠貞分別以講警權問題嘅《無眠夜行》，同描述不倫關係嘅《野犬與貓咪》，攞到公開組同學生組最佳創意獎。