港大生擬踢走陳冠康

【明報專訊】以會長陳冠康為首嘅港大學生會，上任至今風波不絕，繼喺特首選舉爆出黑金聲明、就龍華街宿舍搞公投後，近日換屆選舉又被質疑選舉不公正。有港大同學話，呢年係港大學生會「最晦暗無光的一年」，發動聽晚喺校園集會，又搞網上聯署，要求陳冠康同評議會主席譚振聲下台。


今屆多風波 學生：最晦暗一年

發起人之一嘅港大醫學會外務副主席盧劻業話，發動今次集會嘅導火線係學生會幹事弄權，企圖操控周年大選，令選舉未開始已發生唔少不公事咁話。佢舉例話，學生會今年未有按照往例，正式向所有同學發電郵，公布報名參選學生會嘅截止日期，反而只喺去年12月31日、即同學放晒假嘅時候，突然喺學生會門口貼通告，宣布即日截止報名。


不滿無公布報名截止日

盧劻業又話，陳冠康近日多次向同學發電郵，片面交代今次周年大選嘅風波，佢指內容不盡不實，誤導公眾，所以大家先至決定要求陳同譚振聲下台。佢透露，目前網上聯署人數突破800人，相信未來陸續有嚟。Emily噚晚致電陳冠康，但未能搵到學生會回應。