CY唔認錯傑哥食早餐嬲爆

【明報專訊】公民黨立法會議員噚日同特首梁振英喺禮賓府食早餐，黨魁梁家傑餐後表現有啲激動，炮轟CY對家香港寸步難行唔肯負責，「特首佢認為自己無錯，所有錯係錯喺其他人」。原來早餐會上，傑哥已經唔係好高興，同CY傾咗幾句有關政改嘅問題後，已無同CY再講嘢，仲係「谷爆坐喺度」，皆因CY講嚟講去，都答唔到政改點做。


幾時發電視牌 CY無回應

黨友湯家驊透露，會上曾向梁振英解釋，上次政改方案初時不獲通過，係因為社會喺首部曲時討論唔夠，時任特首曾蔭權就匆匆將方案交上北京，令泛民協調唔到。佢哋要求政府盡早啟動政改諮詢，但對方就只係話聽到同明白，最終就激嬲咗傑哥。


毛孟靜就喺會上質問CY幾時發新電視牌，但CY無回應；會上仲傾到行政立法關係、青年上樓同北大嶼山發展等問題。


會後傑哥話，對於CY認為任內仲有一段長時間處理政改問題，感到失望及詭異，又希望CY深切反省，唔應該有「自己無錯」呢個諗法喎。