用微信要自拍身分證？

【明報專訊】早排Android用家因為WhatsApp要每年收費，大發雷霆，WhatsApp嘅競爭對手LINE、微信等乘機出擊搶客，希望唔想畀0.99蚊美金嘅用戶過檔，不過來自內地嘅WeChat微信近日又有啲是非喎。話說博客蔣薇噚日喺facebook炮轟，不滿微信嘅公眾平台實名化，要求用戶攞住張身分證自拍，蔣薇喺網上留下一篇文章﹕〈再見，微信〉！


用戶憂紀錄存檔 有手尾跟

Emily噚日就未搵到微信回應，不過，唔止一個用戶咁講，話微信有呢個新要求。


蔣薇喺facebook話，自己有微信帳號，用嚟發文，點知噚日佢登入時發現微信要佢填寫一系列個人資料，不單真實姓名、電話、身分證，仲要佢攞住身分證自拍一張相上載，蔣薇話受不了，佢話攞身分證自拍，只能聯想到罪犯坐監時影嘅相，擔心呢個紀錄會存檔喺某個地方，日後佢發文章一旦提到敏感詞，可能有人發短訊警告甚至寄信畀佢，最後喺佢屋企樓下唔畀佢講嘢……蔣薇講明上述全是推測，佢已決定向微信say goodbye！

香港資訊科技商會會長方保僑話佢都有用微信，為安全起見，佢都唔畀呢個app可以用到佢手提電話內嘅電話簿，擔心資料外泄。佢又話不單微信，內地嘅新浪微博都要用戶實名化，要用戶提供文件證明自己身分，呢類要求對睇重私隱嘅網民嚟講，好多人都接受唔到。