維園耍拳「聲討」社民連

【明報專訊】維園年宵門外噚日突然有班殺氣騰騰嘅漢子耍拳，後面掛起嘅橫額相當「激」——「若人動手勢必還手」、「替天行道」、「盡打妖人」……就咁睇都嚇親唔少途人。究竟佢哋要「聲討」嘅「妖人」係邊個？原來係社民連。


稱不出手免傷無辜

負責今次行動嘅東方體育會負責人苗祺鈺話，今次唔係嚟「表達訴求」，而係嚟「聲討」泛民，批評佢哋終日追殺特首梁振英、為反而反，荼毒年輕人「以為無普選會死」。佢哋本來帶晒鼓旗打算衝入年宵挑釁社民連，但最終放棄念頭，「我哋啲師傅一出手就唔係咁簡單，唔想傷害無辜」。


幾十億身家唔使收錢撐梁

苗祺鈺承認曾參與「愛港之聲」嘅挺梁活動，但就否認係收咗錢先出嚟踩泛民，仲話自己作為富士通香港總代理，有成幾十億身家，唔使貪呢啲錢。佢話，愛港之聲只係識得搞集會挺梁，作風太溫和，佢哋未來會以更激進方式表達意見。咁點睇梁振英被練乙錚話佢涉黑呢？苗祺鈺冷笑幾聲後話，梁振英唔係百分百好人，而黑金政治亦全世界都有喎。