猴子偷柑陳鑑林怕怕

【明報專訊】農曆新年人人都想黃「金」滿屋，民建聯陳鑑林應節買咗大盆柑返屋企，但就惹來不速之客，就係金山嘅馬騮仔。佢之前將盆柑放喺門外，想同啲年花擺埋一齊欣賞，但最近就有街坊目睹馬騮偷佢嘅柑，搞到佢都怕怕，急急搬番盆柑入屋，擺喺大廳，先冇咁心掛掛。


陳鑑林身兼立法會交通事務委員會主席，政府早前拋出3個海底隧道分流方案，但鑑林潑冷水，話分流計劃「唔搞好過搞」。佢話政府成日講其中一個方案，可將4000架車由紅隧分流到東隧，但局方好似唔記得咗，仲有萬幾架用緊紅隧嘅車，會因紅隧加價而反對。鑑林話，審時度勢，政府不如等過幾年收番東隧專營權，先再諗點分流好過。


「下籤都係好籤」

身兼全國政協委員嘅佢又話，3月人大政協兩會開會，會向內地反映港商到大陸經商「小門未開」嘅情况。鄉議局主席劉皇發為香港求得下籤，鑑林就同發叔統一口徑，話下籤對香港人嚟講都係警惕，都係好籤喎！