何俊仁住深井嫌飛機嘈

【明報專訊】民主黨何俊仁每逢農曆新年都會喺天后屋企宴請傳媒，但今年就移師深井。原來佢屋企大廈要全幢維修兼翻新，佢就獲得朋友平租深井單位畀佢暫住，佢仲話新居意想不到咁好住！


仁哥話，深井交通比佢想像中方便，加上景觀唔錯，坐擁青馬大橋海景，唯一唔好處就係飛機噪音大，佢笑言呢樣嘢令佢明白點解馬灣居民咁反對建第三條跑道喎。


左派問點解唔申回鄉證

早排民建聯李慧琼同工聯會鄭耀棠先後表示關注泛民無回鄉證嘅問題，仁哥透露，近排亦有左派人士向佢放風，問佢點解唔嘗試申請，睇下得唔得咁話。佢認為，今次係中央近年來最積極處理事件嘅一次，但明言若中央以民主黨唔再批評政府為交換條件，或只係分階段向泛民發放回鄉證，民主黨係唔會接受。