囝囝醫院過年阿涂無眠

【明報專訊】民主黨立法會議員涂謹申呢個農曆新年認真無覺好瞓，皆因佢個心肝寶貝仔信之病到入醫院！話說年廿八信之已有少少燒，為安全計，年廿九朝早阿涂帶阿仔去睇醫生，以免新年假期無醫生睇，點知當日下午信之突然高燒，燒到104℃不特止，仲要抽筋，嚇到阿涂一身汗，馬上叫救護車送阿仔去醫院，時值年廿九，好彩有工人姐姐喺度可以陪住信之，阿涂兩公婆先可以離開醫院一陣食團年飯，之後阿涂就返醫院陪信之留醫喇。


儀器掙脫 警號常響

話就話一齊瞓，但因為信之身上繫有儀器，24小時觀察佢嘅情况，不過信之瞓覺時郁嚟郁去，令儀器不時鬆脫，警號隔一陣就響，搞到阿涂無覺好瞓。之但係為人父母，最重要囝囝無事，而事隔兩晚，信之已康復仲有笑容，初二嗰日醫生仲畀佢放假暫離醫院一天，年初三返醫院覆診確定無事就可以返屋企喇。阿涂話信之應該係受過濾性病毒感染，Emily祝阿涂一家身體健康，萬事如意。