CY民望又跌

【明報專訊】中國人鍾意喺新年祝人步步高陞，相信特首梁振英就最需要呢個祝願喇，事關佢嘅民望似乎只跌不升，港大民調更發現佢最新支持度下跌1.8分至46.3分，是上任以來嘅新低。港大民意研究計劃本月1日至6日期間用電話訪問咗1005名市民。調查發現，CY支持率得31%，反對率就有53%，民望淨值（支持率減反對率）係負22個百分比（上月中為負14個百分比）。港大話今次調查只包括劉夢熊指控梁振英嘅效應，仲未計梁振英發律師信畀《信報》一事，預計佢嘅民望仲有下調壓力喎。


司長方面，政務司長林鄭月娥同財政司長曾俊華嘅支持度淨值分別錄得正48個百分比同正46個百分比，遠較律政司長袁國強嘅正6個百分比為高。


高登仔籲禁回港「播疫」

另一邊廂，英國發現懷疑人傳人嘅俗稱「新沙士」個案，有高登仔就醒起CY喺英國度假，有人講笑話要發起要求政府禁止畀CY返港，以免將病毒帶到香港，但衛生署其實都只係建議呢類旅客若有呼吸道病徵，就要戴口罩同求醫啫。