葛珮帆偕象過情人節

【明報專訊】新春假期唔少政界人士外遊，民建聯立法會議員葛珮帆（EQ）去咗金三角影大象同考察自然保育，寓假期於學習。EQ話情人節喺保育區過，陪伴佢嘅除咗同行嘅人，仲有6歲嘅「小情人」Thangmo——呢個字係當地言語，係「西瓜」咁解。


訪金三角認識大象保育

EQ酷愛拍攝大自然動物，海底影鯊魚，南極影企鵝，今次就去咗金三角睇大象。佢話「西瓜」與很多同伴原本被賣到城市，喺好差嘅環境下，每日為遊客工作10幾粒鐘。早前「金三角亞洲大象基金」以及兩間酒店Anantara及四季酒店買佢哋返嚟，放番佢哋喺金三角自然環境下保育及研究。


EQ話，金三角亞洲大象基金研究人員講到大象保育工作情况，令佢對大象生態亦認識不少。佢話大象係瀕危生物，亞洲大象過去50年數量急跌50%，家只剩約3.5萬隻。佢慨嘆非法象牙貿易不絕，非法捕殺大象並無停止。