公專聯想追李國麟葉建源

【明報專訊】公共專業聯盟莫乃光（Charles）同梁繼昌（Kenneth）平時喺議會難兄難弟，最近傳出兩人有新嘅「追求」對象，就係教育界議員葉建源同衛生服務界李國麟。Kenneth話，其實一入立法會都想同葉、李多啲合作，因為公專聯缺乏教育界同醫學界嘅「大腦」，若葉、李加入，可畀多啲呢方面意見。


盼組四人聯盟交換意見

Charles噚日同Emily講，希望將來四個人組成一個比以前「五散人」更緊密嘅聯盟，可以分擔研究資源之餘，民生議題亦唔使要綑綁投票。不過，若議會談及言論自由等核心議題，例如政改，四個人就最好綑綁投票。Kenneth承認，政改投票取向都係問題癥結，因為葉建源可能要考慮教協立場，李國麟亦要同選民交代，但會盡量同對方傾，希望能邀請佢哋入會。


李稱考慮 葉潑冷水

對於入會「追求」，李國麟噚日話係考慮係咪繼續獨立嘅契機，佢話自己比較熟悉老人同醫療政策，如果有多啲人畀意見都幾好。葉建源就潑冷水，話希望維持獨立身分，唔介意同公專聯多合作，但就話希望喺唔同嘅議題上，可以與唔同嘅議員組合合作。