古思堯受重犯歡迎

【明報專訊】社運人士古思堯早前因焚燒國旗被重囚9個月，要喺獄中過年，噚日民主黨立法會議員何俊仁同工黨李卓人，齊齊去赤柱監獄探古思堯。赤柱係重犯重地，但仁哥話，阿古並無因坐牢沮喪，相反精神抖擻，笑容滿面。阿古仲同仁哥講，入監時不但無被人欺負，反而收到很多重犯嘅食物作見面禮，獄中甚受歡迎。


仁哥阿人赤柱探監

仁哥同阿人同阿古傾咗超過半小時，佢話其他囚犯雖然善待阿古，但阿古仍選擇單獨囚禁，每日出外吹風一小時，其他時候除咗睡覺，就喺囚室睇書同埋思考。阿古話對焚燒國旗毫不後悔，且要為和平理性嘅公民抗命立下先例，因為現時發生喺佢身上，係佢計劃行動嘅預計後果。


仁哥就話，見到阿古，令佢想起了美國哲人梭羅嘅名言：「面對一個不公義囚禁人民的政府，監獄便成為真正公義者的歸所。」仁哥因而話，想大家一齊向阿古致敬！


阿古先後喺抗議內地民運人士李旺陽「被自殺」及喺元旦遊行中展示塗污嘅國旗、區旗及焚燒國旗，本月初被裁定4項侮辱國旗區旗罪成立，判囚9個月。