黃偉賢倡荔枝山莊旁建骨灰龕

【明報專訊】施政報告預留1億元畀每個區議會做社區重點項目，民主黨元朗區議員黃偉賢建議，喺元朗大棠香港模型飛機協會目前租用嘅官地建骨灰龕。本來起喺郊野公園「邊皮」都好正路，但據聞地點好近十八鄉鄉事委員會主席梁福元有份經營嘅大棠荔枝山莊，梁就話對建議持開放態度，又話要諮詢居民先。


查實民主黨唔係得一個建議，另一選擇係拆咗朗邊部分中轉屋改建公屋，但預料兩個建議都好難實現。黃偉賢話，大棠近採泥區呢幅地係官地，好易改用途，而骨灰龕好有需求，第日仲可以「滾番啲錢返嚟」起其他設施，好值得諗。


但黃偉賢質疑1億元嘅項目，民建聯同政府已講掂數，所以相信民主黨嘅建議應該唔成事。對於建議用地鄰近荔枝山莊，佢話兩幅用地「隔咗個山頭」，唔同路口入，所以應該唔會影響梁福元喎。