酒會揀客 西環新人事舊作風

【明報專訊】中聯辦主任張曉明新官上場，今年都繼續舉辦新春酒會，向工商界同親中團體廣發英雄帖，但泛民主派繼續唔係人人有份。中聯辦選擇性請人，泛民亦以冷淡回應，部分人就算收到邀請，都話冇興趣去，似乎唔係好畀面張主任。


卿姐：議員自決出席否

民主黨裏面，暫時有新丁立會議員胡志偉同涂謹申確認收到請帖，但志偉話無計劃赴約，不過唔係因為中聯辦主辦嘅緣故，而只係自己向來都對呢啲酒會冇乜興趣，即使係民政總署搞嘅都唔會去。多年來首次獲邀嘅阿涂，就未決定去唔去，話要同黨友傾吓先。


該黨主席劉慧卿話，民主黨從來都唔會決定去唔去呢啲場合，會交畀議員自行決定。另外，新民主同盟范國威亦話自己未獲邀，但強調有得去都唔會去咁話。


湯家驊：年年出席 純粹畀面

公民黨暫時就有湯家驊同郭榮鏗收到帖，兩人都話咗會去。年年都出席嘅湯家驊話，酒會咁多人去，預咗都唔會同中聯辦啲官員有乜嘢機會交流，通常只係打個招呼就算，話赴會純粹畀面，費事令人覺得好似拒人於千里咁喎。