老婆踢爆單雞識食唔識煮

【明報專訊】講到識飲識食識享受，民主黨內首推單仲偕（單雞）。Emily同一班記者行家噚日去單仲偕屋企拜年，佢同太太幾乎整咗個「環球菜式餐牌」出嚟，好似澳洲和牛、法國田螺、加拿大豬扒同丹麥芝士等，唔少行家都話佢唔做議員可以開私房菜。不過，「煮得唔食得」，事關單雞個醫生話佢超重，今年內要減足10磅喎。


醫生敦促減10磅

單太聽到單雞不斷介紹啲菜式時，即時話對方「只係識用口煮」，原來單雞閒時成日上YouTube睇人教煮餸，睇中咗就叫老婆跟住嚟做。愛好杯中物嘅單雞話，近排都冇搵前政務司長唐英年敍舊歎酒，亦話對方嘅紅酒收藏太貴，「似飲錢多過飲酒」，無意競投對方將要攞出嚟拍賣嘅紅酒喎。


講開政改方案，單雞話泛民仍努力籌組緊新嘅合作平台，但相信要到3月先有眉目，有信心公民黨會加入。