蔡伯勵話今年冇有怕

【明報專訊】鄉議局主席劉皇發今年喺車公廟為香港求得下籤，唔少解籤人都預言今年香港將會好大鑊，既可能被新一輪金融海嘯困擾，亦可能爆發大疫症。不過，殿堂級風水大師蔡伯勵就冇有怕，佢話今年係好年，只要大家小心啲，就乜事都可化解咁話。


蔡伯勵退休後鮮有公開露面，佢噚日出席港台春茗時同Emily講，今年蛇年係好年，唔會差得去邊，相信車公只係想提點港人做事要審慎，政府施政亦會慢慢暢順喎。


發叔：下年會繼續求

負責求籤嘅發叔就慨嘆，今年求籤都有齋戒沐浴，以表誠意，可惜事與願違，未能孚眾望求到好籤。佢話，為香港求籤嘅壓力一定有，但下年一定會繼續求，唔會因而放棄。


新世界發展主席鄭家純就話全世界都有小人同好人，至於特首梁振英身邊係邊樣多啲就好難講，最重要係香港社會和諧咁話。