涂謹申仔仔豐收

【明報專訊】噚日係農曆新年後第一個立法會大會，唔少議員男嘅打紅呔、女嘅一身紅衣咁開會，民主黨涂謹申仲帶埋阿仔信之見吓大家兼利市。信之新春前後病到入院住咗3日，阿涂話覺得個仔病完反而成熟咗，信之亦識得兩手請請同人恭喜，十分得意。


無論係泛民定建制派，見到信之咁得意都主動行埋去派利市，新民黨葉劉淑儀仲大讚信之好大隻同健康，仲話早知佢都帶埋阿女落立法會同大家拜年喎。


特首請食餅 一盒夠晒？

新年開會，立法會主席曾鈺成同內務委員會主席梁君彥都分別買咗朱古力餅同士多啤梨請記者食，特首梁振英亦買咗一盒餅畀70個議員，但議員咁多，佢先買一盒，唔知夠唔夠分呢。