美領事自稱姓楊唔食羊

【明報專訊】多次關注香港民主進程嘅美國駐港總領事楊甦棣（Stephen Young），一直係「惹火尤物」，2010年上任至今多次被左派報章抨擊佢「干預香港」。噚日楊甦棣不談政事，穿上廚師制服表演煮羊扒，宣傳由美國駐港農業貿易處主辦嘅廚藝競賽，仲講爛gag搞氣氛。


楊甦棣喺專業廚師領導下，一改西裝骨骨形象，學習煎羊扒、整薯蓉，仲學埋大師咁拋鑊。佢笑言因為自己個中文名姓「楊」，所以唔太鍾意食「羊」，寧願食魚。


對於有報道指解放軍黑客多次有系統咁入侵美國政商電腦網絡，楊甦棣就話由佢喺白宮嘅同事回應會比較恰當，但話呢件事主要針對內地，相信香港喺「一國兩制」保護下，唔會影響商家喺香港投資嘅意欲。


多謝港人支持領館賀年片

佢又話好多謝港人支持美國駐港總領事館嘅賀年片段，笑言佢身處美國嘅囡囡都喺facebook轉載喎。