田少唐唐月月8人酒會

【明報專訊】自由黨榮譽主席田北俊同前政務司長唐英年都係酒友，田少噚日同記者團拜時透露，佢同唐唐及另外6個朋友，每個月都會搞飲酒會，仲一齊鋸牛扒，但Emily問佢另外6個朋友嘅身分時，佢就話講咗Emily都未必識喎！咁神秘，唔知飲過咩佳釀？

田少話，飲酒會每次都有唔同葡萄或地方嘅主題，成員共8人，每人帶一支酒，每次就試8支，所以都試到好多酒，但由於佢哋飲紅酒多，所以都係配牛扒、羊扒比較配合，比較少食魚。


至於唐唐早前放售嘅勃艮第葡萄酒，田少話睇過，可能係因為啲酒就快到「peak」（最佳存放時間），所以先想同人分享；至於佢自己有嘅酒都唔少，特別係後生時無諗到老咗會少飲咗酒，所以未使補貨住。


指天榮站流標因補價過高

前日港鐵旗下天水圍天榮輕鐵站上蓋項目流標，本身係地產商嘅田少話，相信發展商無夾埋，因為投標唔同拍賣，發展商大家都唔知互相出價，發展商唔入標隨時會蝕底，畀對手執平貨。


田少話，今次流標只係港鐵要求嘅補地價過高。睇番資料，補地價每呎2700元，田少話嗰區家樓價都係5000幾，若計埋補地價後成本要6000幾，發展商好難有人入標。