林鄭訪京欠透明記協炮轟

【明報專訊】政務司長林鄭月娥前晚抵北京，出席「深圳前海深港現代服務業合作區建設部際聯席會議第二次會議」，但政府今次採訪安排引起傳媒不滿。


記者協會噚日發聲明，話林太今次出席嘅係實務工作會議，質疑政府事先無安排採訪，「透明度極其惡劣」。但新聞處話噚日有記者喺北京要求採訪林太，已即時安排，處方噚晚7點幾亦有新聞稿講會議內容咁話。


「透明度極其惡劣」

記協質疑，今次外訪有多名主要官員同高級公務員隨行，亦係實務性質嘅工作會議，但政府除咗上周二晚發出官員外訪通知，並無向本港或駐京記者作採訪安排，認為特區政府嘅透明度極其惡劣。佢哋認為政府嘅處理手法無助新聞界採訪今次會議，會削弱公眾知情權。


新聞處：即時回應採訪要求

政府新聞處話，上周二已發稿通知傳媒林太外訪，噚日有記者喺北京要求採訪林太，林太亦有回應，所以林太先會有得喺北京講長實雍澄軒拆售嘅事。至於與內地官員會議內容，新聞處就話噚晚7點幾亦有發稿。Emily就希望林太下次訪北京，可以多啲聽傳媒意見啦！