考帆船肥佬 陳維安要補考

【明報專訊】立法會秘書處噚日同傳媒行家聚會，唔少秘書處職員出席，今年頭去新西蘭度假時整親左手嘅秘書長陳維安（Kenneth），噚日見佢已經拆咗石膏。佢同Emily講，呢兩個月唔少傳媒行家關心同問候佢，在此多謝晒。Kenneth又話，呢個聚會sound bite（精句）就無乜，不過food bite（美食）就好多，Emily非常同意。


人大政協兩會呢個月喺北京開會，其間立法會大會休會，Emily問Kenneth呢排有乜搞作，原來佢一直學緊揸帆船，仲唔係玩玩吓，真係走去考牌，試卷有兩部分，佢只喺船長呢部分合格，大偈嗰部分就肥佬，4月要補考。


其實，帆船係Kenneth嘅囝囝學先，所以係親子活動，Kenneth暫時學嘅只係風力推動嘅帆船，要加摩打就要考到牌先至得。佢話，唔係諗住會揸好遠，頂多由香港仔駛到石澳，或者喺維港內暢遊。


玩開帆船嘅公民黨郭家麒有時都會同佢分享經驗，不過Kenneth家就未有船，Emily希望佢今次pass啦！