控煙辦上門搵長毛

【明報專訊】社民連「長毛」梁國雄早排有張相upload咗喺facebook，見到佢喺立法會辦公室禁煙範圍叼住支煙，立法會秘書處當時話會跟進。Emily噚日本來去佢「鄰居」新民主同盟茶敘，點知有行家見到兩個身穿衛生署制服嘅人行過，咁就當然走過隔籬望望啦。只見佢哋擺低海報同禁煙標示喺長毛嘅辦公室，就走夾唔唞。


長毛無迎接 落去食煙

長毛其後返番office，佢話衛生署控煙辦一早通知咗佢會嚟，佢話無必要招呼佢哋，所以落咗去食煙，又話當日張相影嗰時，其實佢無點着支煙。秘書處證實有控煙辦去過長毛office，不過強調唔係佢哋安排喎。


講返個茶敘，沙田區議會提議每區1億元嘅亮點工程，會喺大圍重置運動場起綜合社區大樓，同埋提升城門河兩邊設施。新民主同盟區議員容溟舟驚重置項目無政府部門認頭，最後會變成大白象。