陳鑑林：賣舖無關辣招

【明報專訊】有報道話，民建聯陳鑑林喺政府打擊樓市再推「辣招」前，賣咗手上一間大圍金禧花園嘅出租地舖，套現8500萬元，仲喺合約訂明「必買必賣」條款，類似行政會議成員林奮強做法。陳鑑林噚日承認個舖位的確喺1月尾成交，但就話買家一兩年前已經接觸佢，賣舖同呢一次「辣招」無關。


155萬買入 賣8500萬

據《壹週刊》報道，陳鑑林係喺1985年同兄弟以155萬元買入舖位，1996年再用250萬元轉手畀陳鑑林同佢老婆。如今佢成功放盤，以成交價8500萬元、賣家要1%佣計，真係賺唔少㗎，但若陳鑑林喺最新「辣招」後賣舖，就要畀多360萬元印花稅。


陳鑑林噚日重申，真係無收到「辣招」消息，仲話計過8500萬元如果用嚟投資，每個月都有十幾萬落袋，所以先有呢個決定，而買家已經接觸佢好耐。佢又話合約寫明7月先交舖，只係因為對方做銀行按揭都要時間，同驚冧市無關。


至於點解要「必買必賣」，陳鑑林話只係為保障雙方，好多買賣都有呢項條款。個舖位現時係一間參茸藥材店，租約到2015年。