羅范掌醫局阻力多

【明報專訊】人稱肥胡嘅醫管局主席胡定旭今年11月任滿，近日傳出幾個有頭有面嘅人，好似都有機會接任醫管局主席，包括前公開大學校長梁智仁醫生、行政會議召集人林煥光，同埋行政會議成員羅范椒芬。肥胡噚日主持醫管局大會後畀記者追問對繼任人睇法，即刻有少少面燶﹕「我仲有8個月（任主席），咁快想我走？ 」


肥胡話，其實，最關心邊個當主席嗰個係醫管局行政總裁梁栢賢（PY），大家哄笑，PY就笑住話「我哋都等緊」，再引起哄笑。


Emily 聽聞，醫管局有人聽到羅范椒芬有機會做主席，腳都軟晒，震撼程度好似上年傳出梁振英有意畀行會成員李國章做醫管局主席一樣勁。醫局中人話，擔心同羅范難夾，有醫生仲話「若真係羅范當主席，要考慮早啲退休……」。睇嚟，羅范想接掌醫管局嘅阻力都唔細。