田少卸任 記者贈旗「有料到」

【明報專訊】旅發局主席田北俊做埋呢個月就卸任，曾經批評特首梁振英施政「無料到」嘅佢，到底有無料到呢？佢就好謙虛咁話﹕「如果有料到，就做咗特首啦！」

其實田少做旅發局主席呢6年，旅發局業績幾唔錯，訪港旅客由每年2600萬人次升至4800萬人次，贊助金額更由當年嘅幾百萬蚊，狂升到去8000萬，有啲贊助仲係佢親自打電話攞番嚟。梁振英一度話香港唔應該盲目追求旅客數字，但田少就話，旅發局係負責推廣，無理由唔做，正如做生意都唔會嫌多而唔做啦！


最難忘「導遊阿珍」

有「bite王」之稱嘅田少，見親記者都有bite，講嘢又夠直，臨別在即，一班旅遊記者專登送支錦旗畀佢，仲寫到明「有．料．到」，田少收到勁開心。


諗番喺旅發局咁多年，田少話，最難忘當然係鬧旅客嘅導遊阿珍，嗰次仲搞到上咗中央電視台，真係幾難搞。雖然係咁，佢覺得任內工作總算做得幾開心，反而今後真係好有難度，因為旅客爆棚，到底點樣平衡經濟收益，真係唔易。咁要睇吓下屆主席林建岳點拆招喇。