我係香港人tee受歡迎

【明報專訊】喺中港矛盾熾熱下，「印TEE專門店」推出「I'm HONGKONGER」（我係香港人）嘅T恤，英國米字旗同象徵殖民時代嘅龍獅徽章圖案放喺胸前，每件98蚊，喺facebook上載推出唔夠1日已經有200幾人「like」，仲收到10幾張訂單，公司都話出乎意料。


設計者：未接投訴

T恤設計者Joanne Chan話，佢哋係受facebook群組「我哋係香港人，唔係中國人」激發，諗起用殖民時代有關嘅圖案做設計，佢哋仲sell過同款嘅手袋同手機保護殼等。Joanne話，設計嗰時無諗過法律問題，但佢覺得自己無用過中國國旗同特區區旗，相信唔會犯法，而至今佢無收到任何投訴。


之前拍住公民黨毛孟靜成立「香港本土」嘅新民主同盟范國威話，愈嚟愈多人利用殖民地時代嘅象徵符號搞「二次創作」，其實係反映佢哋都緬懷當年嘅生活、價值觀。范國威話，「香港本土」都準備搵啲本土特色做「制服」，可能係香港地標、粵音、繁體字等，突出香港嘅集體回憶。