康泰太子爺拍婚照堅拒化妝

【明報專訊】康泰又有喜事，太子爺、康泰董事總經理黃進達（Jason）今年9月結婚，佢下個禮拜會去韓國影婚紗相，但係佢講到明唔會入鄉隨俗，絕對唔會學韓國男人咁化妝畫眼線，亦都唔會著當地傳統服飾企到直晒咁影相，仲話唔明點解啲韓國人要咁做。


下周去韓國影相

康泰旅行社董事長黃士心接連娶新抱，舊年細仔結婚，今年輪到大仔Jason。身為旅行社老闆，影婚紗相都要周遊列國，Jason先飛去韓國影一轉，遲吓再去布吉又影過。


韓國流行男人化妝，Jason聽到即刻耍手擰頭，話咪搞佢，連執相都唔可以執得太誇，萬一被人畫咗眼線，佢實行出絕招——就係唔畀錢。


黃士心：新抱靚過港姐

Jason嘅未來老婆鮮有曝光，黃士心曾踢爆未來新抱係會計師，讀書時係城大校花，靚過香港小姐喎。