周一嶽為華仔險盲眼

【明報專訊】人稱York Chow嘅前食物及衛生局長周一嶽，剛獲委任為平機會主席。阿York喺記者會上自爆﹕「面試嗰陣隻眼啱啱有事」，Emily於是打電話問候，原來幾個月前，佢喺藝人劉德華宴請傷殘運動員嘅晚宴上想打噴嚏，但當時「劉華」演講緊，佢唯有禮貌地用手掩住個鼻打噴嚏，點知幾分鐘內，有一隻眼已經睇唔清前面嘅嘢，只見一片白影。


「單眼」去平機會面試

第二日眼科醫生同佢檢查，發現佢有一隻眼嘅視網膜破裂，醫生話同眼睛玻璃體老化有關，估計係佢掩鼻打噴嚏時，啲壓力谷咗上隻眼，視網膜受壓破裂出血，致眼前白茫茫，「乜到睇唔到」。


阿York為人樂觀，隻眼有事不單無心急如焚，仲照去平機會面試，當時佢最關心係「單眼可唔可以揸車」，醫生好技巧咁答佢﹕「法例無規定單眼唔可以揸車。」結果阿York睇完醫生，就「單眼」揸車返屋企。


手術後視力恢復九成

家佢做咗激光手術修補視網膜，視力恢復九成，下個月會到平機會返工，每周仍然打壁球做運動保持心肺健康，又出外見朋友，同記者飯敘。Emily叮囑佢多多保重，同埋祝佢喺平機會工作愉快。