「食晒有獎」 記得影張碗碟相

【明報專訊】繼「少飯平一蚊」後，綠領行動又推出「食晒有獎」，獎勵有衣食嘅市民。綠領行動總幹事何漢威話，呢個活動有5個大型商場響應，包括觀塘apm、愉景新城、荃灣廣場、荃新天地及荃錦中心，超過110間食肆參與。


5商場參與 為期兩月

由噚日起至5月26日，市民喺呢幾個商場嘅食肆食飯後，將食到乾乾淨淨嘅碗碟用手機或相機影低，然後上載至「日日都要有衣食，唔好變成地球公敵」嘅facebook專頁，獲得最多人like嘅10張相，就有機會得到豐富獎品，包括酒店晚餐禮券、迪士尼同海洋公園入場券、超市現金券等。


食清光相上載fb

噚日fb已有十幾人將有食衣證據放上網。何漢威話內地今年初推廣「光盤行動」，「晒光盤」更成為時尚，有網民自發上載碗碟相，喺微博被瘋傳5000萬次，活動好成功。


綠領行動評估過，「食晒有獎」會吸引5000名市民參加，預計5個商場喺兩個月內可減少54公噸廚餘，超過政府減少10％嘅目標。