3月兩中華白海豚擱淺

【明報專訊】喺香港定居嘅中華白海豚，生存環境愈嚟愈危險！海洋公園嘅鯨豚擱淺行動組，單喺3月就接到兩宗中華白海豚擱淺個案，其中一宗喺星期一（25日），市民舉報話大澳「番鬼塘」嘅石灘，發現一條中華白海豚屍體，經過解剖檢驗，呢條海豚係雌性，長78厘米，重4.8公斤，相信係啱啱出世（海洋公園保育基金提供）。


專家發現呢條小海豚嘅時候，屍體已經嚴重腐爛，連死因都搵唔到。另一種「易危」物種江豚，喺本港水域只有大約200條，但今年已經收到4宗擱淺個案。有人歸咎香港水域水質愈嚟愈差，鯨豚生存環境飽受破壞。大家想出一分力，保護呢啲稀有動物嘅話，若見到鯨豚屍體，就盡快打政府熱線1823，向「鯨豚擱淺熱線」舉報，當然最重要係珍惜水資源，唔好污染海水！