政府一日宣布9委會

【明報專訊】政府好多諮詢委員會或管理政府基金嘅委員會，任期都會喺3月底完結，政府噚日一口氣公布9個委員會嘅委任。選擇喺長假前公布，唔知係咪博取少啲市民留意，事關家委員會嘅人事任命，要由中央政策組顧問高靜芝睇過，早排曾掀起社會爭論。


今次任命，包括剛獲政府注資150億元嘅僱員再培訓局，副主席由裕華國貨董事副總經理兼廣東省政協常委余鵬春接任，佢嘅親建制色彩濃厚；另外，康泰旅行社董事總經理黃進達就成為僱主代表之一。


房委會就換走咗前自由黨區議員林翠蓮、泛民背景嘅會計界立法會議員梁繼昌、保險界立法會議員陳健波，換入測量師嘅「梁粉」溫文儀，同埋測量學學會上屆主席劉詩韻。


房委會換入兩測量師

社區投資共享基金亦有9個新面孔，包括著名新聞主播魏綺珊，林正財醫生就獲委任為主席。


教育統籌委員會（教統會）主席續由公職王鄭慕智出任，為期2年。


由胡定旭做主席嘅醫管局，會加入3名新成員，分別係中大醫學院暫任院長陳家亮、財務匯報局行政總裁甘博文，同埋港大血液及腫瘤科講座教授梁憲孫。