做佔中民調？民建聯否認

【明報專訊】「佔領中環」近日成為政界主要話題，雖然民建聯等建制政黨極力反對，但佢哋同樣關注事件，學民思潮嘅網上平台《破折號》噚日話，近日有網友話收到自稱來自民建聯嘅電話民意調查，問及市民對「佔中」嘅意見。佢哋推測，民建聯咁關注，日後一定會用有關結果做輿論。不過，Emily問過民建聯秘書長彭長緯，佢就話該黨並無做有關調查咁話。


《破折號》噚日指民建聯做佔領中環民調嘅說法，喺網上廣傳，話佢哋喺調查問及市民嘅立場，包括會唔會擔心中央因為佔領中環而唔高興等。


有網民稱收到電話

佢哋話，睇番民建聯過去嘅調查，主要都係民生議題，好似旅遊保險銷售通脹對市民生活嘅影響等，唔會問到社會行動，所以覺得民建聯對佔領中環有一定關注。但彭長緯噚日就好肯定咁同Emily講，以佢所知，民建聯係無安排做有關佔領中環嘅調查，相信其他團體都會做，所以無必要民建聯做咁話。