黃錦星冇有怕帶團赴韓

【明報專訊】立法會一行18人禮拜一去韓國考察5日，了解當地嘅源頭減廢、資源回收及處理設施等經驗，不過，此時此刻，朝鮮不滿美國出動B-2隱形轟炸機到韓國展開攻擊訓練，領袖金正恩下令戰略導彈候命，隨時攻擊美國本土、夏威夷及關島等美軍基地，以及駐韓美軍基地，已經報名考察嘅民主黨涂謹申擔心，此行有無風險呢？

保安局韓總領館話安全

比議員遲一日出發嘅環境局，今次有局長黃錦星、政治助理區詠芷等人參加，局方發言人話，已問過保安局同韓國駐香港總領事館嘅意見，兩者都話當地安全，所以佢哋會如期出發。


民協馮檢基更無有怕，提早兩日，今日出發先去玩兩天，再匯合考察團，阿基好有信心，即使朝鮮發射導彈，美軍都會打佢哋落嚟咁話。


涂謹申有家室要考慮

向來關心保安議題嘅涂謹申，留意到朝鮮半島局勢緊張，佢話，早兩日已將情况通知立法會秘書處，請佢哋同環境局商量。佢話，未結婚前，一個人乜風險都可承受，但家有太太有囝囝，要諗清楚去定唔去喎。


無旅遊警示 莫乃光唔擔心

另一團友、公共專業聯盟莫乃光話，知道阿涂嘅擔憂，因為佢哋呢班去考察嘅議員有個WhatsApp群組，阿涂將有關新聞傳畀大家睇，但莫乃光唔係好擔心，又話若然有事，政府都應該會提升韓國嘅旅遊警示啦，佢相信此行無乜問題。