陶君行自學考會計師牌

【明報專訊】過去兩年，社民連陶君行先後輸咗區議會、立法會選舉，為咗搵食，46歲嘅佢面對現實，去做會計佬。唔講唔知，阿陶喺大約2007、08年自學考咗美國會計師牌，上年同朋友合作開會計師樓，喺yahoo都有賣廣告，生意算唔錯，至少可以養家。


上年合伙開會計師樓

辦公室喺灣仔，陶君行貴為合伙人，自己都要請秘書、職員，連埋租金，一個月皮費差唔多10萬，仲要同拍檔拆帳，所以每個月佢都要搵番咁上下生意先有得賺。不過，一向樂天嘅阿陶，船到橋頭自然直，你以為佢搞社運會嚇親客人，又唔會喎，佢話有啲客根本唔識佢，而且客人都係睇你嘅服務係咪專業，但亦有客人係因為佢嘅社運網絡而嚟，「有朋友搞大廈法團，橫掂要請會計師核數，咪畀我哋做囉」。


社運網絡帶來生意

阿陶話，當日佢考美國會計師牌，純粹係想克服自己缺點，佢話自己加、減、乘都無問題，但「除」呢個概念唔係好得，於是特登讀會計，成個過程自學，約一年就考到，今年6月佢想考埋香港會計師牌，所以呢排放假都喺屋企溫書，Emily在此祝佢順利！