退休公僕 中山買樓為練波

【明報專訊】財爺曾俊華上周三風塵僕僕去咗中山一日遊，佢話呢類型考察，可以現場睇到珠三角地區嘅最新發展，等佢可以有更多實際材料思考香港未來嘅經濟發展路向。讀萬卷書不如行萬里路，佢話睇到嘅資料，絕對唔喺書面報告可以取代，所以期望未來幾年能夠多啲走訪珠三角和泛珠各省。


財爺今次去中山，先拜訪市政府，而市長陳良賢好詳細介紹咗中山市嘅最新發展。佢亦有同當地港商會面，了解佢哋嘅最新情况。


財爺話，陳市長介紹，目前珠三角地區嘅房地產發展迅速，深圳同珠海嘅房價，已分別升至每平方米25,000元和16,000元人民幣，但中山平得多，目前仍維持每平方米約5000元人民幣，而該市生活指數亦相對較低，話對退休人士而言，這差異無疑好有吸引力。


財爺又話，知道唔少退休公務員同事喺中山置業，佢哋除咗考慮樓價同生活指數，居住環境、空氣質素同其他配套設施都好重要，佢話唔少舊同事喺忠實「波友」，佢哋選擇中山置業，就係為咗市內嘅優質高爾夫球場，方便佢哋操練球技！