阿涂縮沙唔去韓國考察

【明報專訊】立法會環境事務委員會本來一行18人，今日先出發去韓國考察5日，環境局大約10人聽日都會跟住去。不過呢排兩韓關係緊張，朝鮮仲下令戰略導彈候命，仔細老婆嫩嘅民主黨涂謹申，都話因為咁樣而縮沙唔去，阿涂仲話自己評估過風險，既然有兩個黨友都會去，自己唔去影響應該唔大。不過，阿涂今次玩「十個救火的少年」，要自行畀番萬幾蚊團費。


阿涂又話，兩韓處於戰爭狀態，通知咗立法會秘書處，唔知旅遊保險會否隨時失效咁話。


鍾樹根感冒仲諗緊

睇嚟呢團都算係出閘脫腳，除咗阿涂，團友民建聯鍾樹根噚日都同Emily講，呢排患感冒，仲考慮緊去唔去，睇吓今日病情如何再決定喎。團長兼環境事務委員會主席何秀蘭（Cyd）就話，政府一日唔出旅遊警示，立法會都要做好個榜樣照去，Cyd又打趣咁話，建議各團友買個倫敦紀念恐襲嘅紀念杯，寫上「keep calm and go on（保持冷靜，繼續向前）」。環境局就話問過韓國領事，會如期照去。