碧雲接棒「地獄廚神」

【明報專訊】噚日有9個立法會議員參加扶康會同中電搞嘅「香港最佳老友」運動電能烹飪比賽，同智障人士合組隊伍落場鬥番鋪。過去做過「地獄廚神」嘅民主黨劉慧卿，笑言每年只得呢次下廚機會，噚日無驚無險成功炮製咗一味芒果牛柳，而佢嘅黨友黃碧雲就「成功接棒」，成為最新嘅地獄廚神！


跌落地執番照炒

噚日比賽主題係牛肉，事關大會覺得牛肉唔熟都食得，「安全系數」較高，參加者就可自行選擇配料。黃碧雲好特別，選用蘋果炒牛肉，先將牛肉乾煎，再加水、茄汁同糖，主持人揶揄佢嘅菜式經過三部曲——韓燒、藥膳同油浸。碧雲仲被發現將跌落地嘅蘋果放番落鑊繼續炒，地獄廚神非佢莫屬。


議員愛用水果 周中話似雜果賓治

議員似乎對水果情有獨鍾，好似新民黨田北辰就用橙、公民黨梁家傑用火龍果。最搞笑係工聯會鄧家彪用奇異果同芒果，評判之一嘅周中師傅食咗一啖就話﹕「好似食緊雜果賓治！」


最終民建聯陳恒鑌勝出比賽，佢用沙嗲醬先爆香牛肉，再釀入翠玉瓜入面，賣相唔錯，佢話自己贏可能係因為同拍檔合作得好喎。