3特首險被人告

【明報專訊】前特首董建華及曾蔭權、前政務司長陳方安生，甚至立法會議員劉慧卿都被人告？有一個自稱前博愛醫院顧問成員陳天生非直系親屬何寶珠，想用私人傳票控告59人，除咗上述人物之外，仲包括特首梁振英、律政司長袁國強、終審法院首席法官馬道立等等。


何寶珠圖告59人 官拒批

何寶珠話要告呢班人互相包庇、串謀貪污、詐騙公帑、洗黑錢、偽造文件、妨礙司法公正等。除咗告官員，連劉慧卿等立法會議員都告埋。何小姐話曾經向卿姐求助，要求卿姐開記者會向傳媒講佢嘅冤情，但畀卿姐拒絕咗。裁判官杜浩成話，何寶珠無法準確提出任何控罪，亦無法提供證人名單，所以唔畀佢用私人傳票告人。何寶珠喺庭外話會繼續申請傳票，到時告埋杜浩成妨礙司法公正。