導盲犬主人：港人太熱情

【明報專訊】近年愈嚟愈多香港失明人士領養導盲犬，同樣患青光眼致盲嘅陳金就同葉敏儀（Trada），喺上個月由美國分別帶住同樣係拉布拉多犬嘅Nera同Rally返香港。經過一個月，佢哋話香港巿民對導盲犬嘅接受程度好咗好多，不過有時「太過熱情」，影響導盲犬開工。


想影導盲犬 應先得同意

Trada提到，有次帶Rally喺巴士站等車，一男一女突然攞起相機影Rally，Rally一於懶理，唔望鏡頭。點知激嬲咗呢對男女，仲指住Rally嚟鬧，有途人見到建議話﹕「攞啲嘢食引吓佢先會理你㗎！」


陳金就亦都試過遇上唔公平待遇﹕有次帶導盲犬Nera去茶餐廳食飯，店員一見到隻狗就即刻截住，唔畀佢入去。一眾食客替金就「抱不平」，話個店員「你咁做係歧視㗎喎」，金就先至可以順利開餐。


Trada同金就上月得到余兆麒醫療基金贊助，去美國參加為期26日嘅導盲犬訓練課程，於是認識Rally同Nera。佢哋都話，好多市民都知道唔可以阻止導盲犬去公眾地方，但希望大家做多一步，見到導盲犬嘅時候，唔好打攪佢哋，因為咁樣可能令導盲犬分心，隨時傷害失明人士。如果想同導盲犬打招呼，應先話畀主人知，得到佢同意，再同導盲犬接觸。