拉布在即議員買梳化牀

【明報專訊】立法會拉布戰一觸即發，雖然唔少議員已經唔係首次面對拉布，但例如體育、演藝、文化及出版界議員馬逢國，已為24小時開會做足準備，早已買咗梳化牀，帶備冷氣被、衣物，若果會議廳有人拉布，可以返辦公室瞓一陣；要數人頭投票時，佢可即刻落去。佢仲準備咗幾十隻電影DVD，話家做咗電影發展局主席，可以明正言順喺辦公室睇戲喎。


王國興仍然寫大字

工聯會王國興就話，佢會再次用環保紙寫大字，每日寫低拉布累計而浪費咗嘅公帑同時間，又會督促主席對重複或者離題嘅發言作出裁決，唔畀佢哋玩嘢咁話。佢仲話，本來都想「日以繼夜、夜以繼日」咁開會，實行要「馬拉松（開會）對馬拉松（拉布）」，不過建制派議員唔制。佢話，唔會喺三讀發言，費事互相駁火，仲幫咗佢哋駁長條布咁講。


人民力量陳志全（慢必）就話，因為上周五去貨櫃碼頭支持工友，淋濕作病有啲咳，已準備好維他命C同蒜片，增強抵抗力，唔擔心體力不支，最擔心係立法會主席曾鈺成將議事規則收到好緊。佢又話，已經買咗一大堆講公共政策嘅書，希望可以為拉布多啲嘢講喎。


慢必買書幫手拉布

新民黨葉劉淑儀就話，佢囡囡好孝順，買咗張米白色梳化同幾個咕