周一嶽有懶音唔唱中文歌

【明報專訊】離開官場嘅周一嶽轉任平機會主席後，猶如脫胎換骨，唔單止力撐同志平權，日前仲同「明哥」黃耀明喺公民黨晚宴上合唱《禁色》。周一嶽噚日出席「家是香港」起動禮時同Emily講，佢講中文有好多懶音，加上慣咗以英文思維諗嘢，所以由細到大都係唱英文歌為主，冇打算特登學唱中文歌。


唔會同政府敵對

轉任平機會後，有冇覺得講嘢自由咗呢？周一嶽話，做官時都唔係好跟稿發言，最重要係跟事實。佢又話，家陣身分唔同咗，由政府嘅一部分變成監察政府嘅一員，但唔會同政府敵對喎。


政府噚日廣邀社會各界出席「家是香港」啟動禮，仲請各來賓畫畫，合力拼出一幅畫作。不過，全場只得民主黨羅致光（CK）一個泛民成員參與。CK話，佢係以兒童發展基金督導委員會身分參與。出名IQ爆燈嘅佢仲自爆，原來佢讀咗咁多年書，淨係肥過美術一科，所以畫畫呢家嘢都係咪搞佢喎。