《飛黃騰達》亞洲版 亞航CEO聘學徒

【明報專訊】美國商業實况比賽《飛黃騰達》風靡全球，不過比賽一直由美國人自己玩。為咗滿足亞洲觀眾，今次《飛黃騰達》推出亞洲版，5月將播出第一集。而被邀請到節目中招聘學徒、代替美國版裏面的紐約地產大亨Donald Trump嘅，正係人稱商業怪傑嘅亞航CEO Tony Fernandes，比賽勝出者可以獲得6位數字薪金，同埋與Tony一齊做野嘅機會。


6位數薪金 全世界到處飛

成功從呢個節目脫穎而出嘅「超級學徒」，將成為Tony嘅學徒，為期一年。Tony話，跟住佢做野都幾辛苦，要同佢一齊全世界到處飛，仲需要隨傳隨到。第一季從舊年底開始招募參賽者，要求是21歲以上，喺亞洲居住和工作。100名申請者獲得電話面試機會，其中選出30名進行面對面測試同體檢，最終12名入決賽，最後只有1位可以順利成為Tony學徒。


東南亞首位獲福布斯傑出商人獎

Tony是東南亞嘅風雲人物，係大馬和東南亞首位獲得《福布斯亞洲》「傑出商人獎」，除了航空業，旗下仲有酒店丶手機與金融服務業務等。Tony話其實佢一直都覺得自己唔適合參加呢個騷，不過製作人好有誠意，取景國全部揀Tony想去嘅國家，而且為遷就Tony時間，把拍攝時間壓縮到一個月內。


《飛黃騰達》亞洲版和美國版都係由電視製作人Mark Burnett監製，5月播出的第一季一共11集，將喺AXN亞洲頻道播出。參賽者多來自東南亞，未有中國人入決賽。