譚香文入前綫自動變人力

【明報專訊】被外界形容為「過氣民主女神」嘅黃大仙區議員譚香文（Mandy），自從退出公民黨後一直保持「單身」，但佢最新嘅卡片就暴露咗佢嘅新去向，事關Mandy喺卡面上印上前綫同人力logo。


黃毓民：從無邀對方入黨

外界對Mandy加入前綫都唔覺驚訝，事關佢過去已多次出席佢哋嘅公開活動。Mandy解釋，加入前綫係因為覺得佢哋爭取民主夠堅定，又話自己撐拉布。人民力量黃毓民就話，自己從無邀請Mandy入人力，只係對方入咗前綫，先會自動成為人力會員。至於人力嘅fans，正面睇就話Mandy有機會代表人力喺九東出選，但亦有口痕友話，咁上屆代表人力嘅黃洋達又點呢？同埋Mandy出選，係咪又可以贏到社民連嘅陶君行？